Daghang mga sugilanon sa pag-antos, kakugi, ug kalamposan karong mga panahona, kay tingpaso na man sa mga tinun-ang nakatapos na sa ilang kurso sa kolehiyo.

Ang ilang kaagi mga bulawanong istorya nga kakuhaan nato og pagtulon-an—nga dili babag ang kalisod sa pagkab-ot sa gimithing kalamposan.

Sama pananglit sa security guard nga si Erwin Macua, nga nakahuman sa kursong General Education (ug cum laude pa gyud) sa Saint Theresa’s College, ang mismong tunghaan nga iyang gibantayan.

Motrabaho siya alas 7 sa gabii hangtud sa alas 7 sa buntag, ug moeskuyla alas 7:30 sa buntag hangtud sa alas 4 sa hapon. Sa tanto niyang bantay sa gate sa maong eskuylahan nakabati siya’g kaikag nga sa umaabot magtudlo sab og mga tinun-an sama sa iyang mahimamat kada-adlaw.

Dihay mga higayon nga kaundangon na siya, ilabi na wala na siyay panahon sa iyang pamilya, apan nipadayon lang gyud siya. Ug inabagan sa eskuylahan nga nihimo kaniyang eskolar aron gamay nalay iyang bayran, nipaso si Nacua isip usa sa mga tinun-ang nakahuman sa ilang mga kurso niadtong Marso 24.

Pulong pa niya, dili siya makatuo ug daw dili tinuod nga sa kataposan nagbunga ra ang iyang pag-antos.

Laing sugilanon mao ang kang Meriam Libongcogon nga nakahuman sa Philippine Military Academy niadtong Marso 12. Nagtubo sila sa kalisod sa lungsod sa Balamban. Gani, natural nalang kanila nga kamote o kaha saging ra maoy pagkaon.

Sa iyang linghod nga edad nga nueve anyos nagsugod na sab siya og panarbaho aron lang makatabang sa pamilya. Manghakot og bas, manguha og lubi, mangahoy, siya anad na sa pagsugakod sa kalisdanan.

Human sa high school, nagpabuwan siya sa Siyudad sa Sugbo sa pamasin nga makaeskuyla og kolehiyo, apan wala kini nahitabo kay dili makaya sa iyang oras.

Apan nipahiyom ang Diyos kaniya kay nakasugat siya og usa ka tawo nga maoy nagsulti kaniya nga mosuway pagsulod sa PMA, nga anaa mahimutang sa Siyudad sa Baguio. Nitrabaho siya isip katabang sa maong tawo, kansang anak nagtudlo sa PMA, samtang nagpaabot sa sangpotan sa iyang pagduso sa iyang aplikasyon.

Karon, si Libongcogon anaa na nadestino sa Philippine Navy isip junior commissioned officer. Pulong niya, imbis nga gitan-aw niyang babag sa kinabuhi ang ilang kapobrehon, gihimo kini niyang hinungdan aron siya maningkamot sa kutob sa iyang mahimo.

Laing nakahuman sa pagtuon bisan pa sa kalisod mao si Jaykummer “Dodoy” Teberio, nga nahimong ilado sa mga tawo tungod sa iyang kasadya ug pagkamalipayon sa iyang pagbaligya og tubig sa mga drayber ug mga pasahero sa may Mabolo, Siyudad sa Sugbo.

Siya namaligya og tubig sukad 12 anyos aron pag-abag sa iyang mga ginikanan sa ilang galastohan sa balay ug sa eskuylahan. Wala niya tagda ang mga bugal-bugal ug panghimaraot nga nadawat kay pursigido siya sa iyang pagtuon.

Niadtong Marso 15, nahuman ni Dodoy ang Bachelor of Science in Secondary Education. Nahimo kini ni Dodoy tungod kay sa iyang kinabuhi ang kanunay niyang gihunahuna mao nga makigbisog gyud, dili magpapildi sa mga pagsuway.

Laing may maanindto nga sugilanon mao si Christian Jeanoe Losa, nga nakahuman sa kursong Bachelor of Science in Hotel and Restaurant Management. Sa iyang pag-eskuyla sa Jose Rizal University, siya kanunay nangutang aron lang gyud maka-eskuyla. Dinha ganiy mga higayon nga dili siya makaapil sa test kay wala gyud siyay ikabayad.

Pulong niya, bisan pa uwaw ang mangutang, gibuhat kini niya kay lagi gusto gyud siyang makahuman sap ag-eskuyla, ug nga walay padulngan ang iyang kinabuhi kung magpasulabi kaniya ang kahadlok ug ang pagkauwaw.

Bisan diin sab siya maabot sa iyang pagpaninda, uwan ug init giagwanta, aron lang gyud adunay kwarta nga magamit sa pag-eskuyla.

Pulong pa ni Christian, “Sana kahit pano mainspired ko kayo na kahit may kulang man sa pamilya niyo, tuloy niyo lang! Kase ikaw at ikaw pa din ang gagawa ng kinabukasan mo. Kaya sa mga studyante dyan na nangangarap at may plano sa buhay, walang susuko dahil madaming paraan (Unta sa bisan sa niining paagi nadasig ko kamo nga bisan may kuwang man sa imong pamilya padayon lang gyud! Kay ikaw ra maoy momugna sa imong ugma. Maong sa mga estudyante diha nga nangandoy ug may plano sa kinabuhi, dili gyud motahan kay daghan pang mga paagi)!”

Ang mga kaagi ni Macua, Libongcogon, Teberio, ug Losa nagpatuod lang gyud nga kung molihok ang tawo ang Ginoo anaa ug andam og tagana sa pagtabang kaniya.